Район башлыгы Анатолий Ивановнын котлавы

Мөхтәрәм мөселман кардәшләр! 

Район Советы, башкарма комитеты, “БЕРДӘМ РОССИЯ” сәяси партиясенең җирле бүлекчәсе исеменнән Сезне мөселманнарның иң нурлы, иң күркәм бәйрәмнәреннән берсе – Корбан гаете белән ихлас күңелдән тәбрик итәм! 

Әлеге бөек бәйрәмнең төп асылы тирә-юньдәгеләр турында кайгырту, изге эшләрдә үзара ярдәмләшеп яшәү, туганнарыңа һәм якыннарыңа шатлык бүләк итүдән гыйбарәт. Корбан гаете кеше күңелендәге рухи яңарышны чагылдыра, кардәшләр, фәкыйрь-мохтаҗлар турында кайгырту зарурлыгын, Аллаһының рәхмәте чиксез киң булуын искәртә.

Дөньядагы барлык диннәр өчен уртак булган шәфкать-мәрхәмәт һәм гаделлек кебек хисләр тәрбияләүче бу зур тантананың хәзерге җәмгыять нигезләрен ныгытуда әһәмияте һич кимеми, киресенчә, үсә генә бара.

Төрле милләтләр һәм диннәр арасын суытмыйча, алардагы татулык, хезмәттәшлек рухын, уңай мөнәсәбәтләрне саклау, һичшиксез, республикабызның, районыбызның гаять зур казанышы булып тора. Безгә ата-бабаларыбыз васыять иткән милләтара һәм динара тынычлыкның югалуына юл куярга ярамый. Районыбыз мөселманнары киләчәктә дә диннәр арасында үзара хезмәттәшлекне, тынычлыкны, иминлекне ныгытуга үзләреннән саллы өлеш кертерләр, дип ышанам.

Әйе, дин җәмгыять тормышында гаять мөһим урын алып тора. Яңа мәчетләр салына, булганнары яңартыла. Хәзерге вакытта районда 55 мәчет, бер мәдрәсә эшли, аларда барлык дини йолаларны, шәригать кануннары таләп иткәнчә, әзерлекле имамнар тормышка ашыра. Кешеләр дингә көннән-көн күбрәк тартылалар. Дин чисталыкка, тәртипкә, тыйнаклыкка өйрәтә, шуңа күрә барыбызга да халык, аеруча яшьләр белән тагын да активрак аралашырга, аларны дин һәм үз халкыңның күркәм традицияләрен, йолаларын өйрәнүгә җәлеп итәргә кирәк.

Районыбыз мәктәпләренә “Тормыш дәресләре”, “Әхлак дәресләре”, “Олимпиада-100”, “Сәләтле балалар”, бизнес-план проектларын кертеп, балаларыбызны кечкенәдән үк камил шәхесләр итеп тәрбияләргә омтылабыз. Нигезе нык булган җәмгыятьнең генә киләчәге матур була ала!

Хөрмәтле мөселман кардәшләр! Корбан бәйрәме һәрберебезгә дә уңай энергия, илһам өстәсен, бәрәкәт һәм муллык китерсен иде!

Күңелләребездәге иман нуры бервакытта да сүнмәсен, һәр йортка, һәр гаиләгә тынычлык, бәхет, сәламәтлек һәм уңышлар насыйп булсын! Бәйрәм белән Сезне!