Җырлап ачыла күңел

 

Мәдәният йорты ишегеннән керүгә үк Югары Ушма ветераннарын аш табыны һәм Илфир Исламовның җырлары каршы алды. Әбиләр чөкердәшеп чәй эчтеләр, мәдәният йорты директоры Гадения Шалакина, сәнгать җитәкчесе Әлфирә Вагыйзова, аның сеңелесе Әнисә Нигъмәтҗанова, китапханәче Гөлсинә Байкиева, техник хезмәткәрРәйсә Исмәгыйлова әзерләгән сый-нигъмәтләрдән авыл иттеләр. Өстәлдә нәрсәләр генә юк иде: төрле салатлар һәм венегретлар да, өрек, алма, кәбестә пироглары да. Кәтлитләр белән бәрәңгеләргә кадәр пешереп алып килгәннәр алар. Өстәлнең иганәчеләре дә үзләре булганнар. Авыл җирлеге башлыгы Наил Васыйлов та бәрәңге, чөгендер, кишер белән ярдәм иткән, үз акчасына кибеттән азык-төлек алып бирәгән. 

 

– Былтыргы Өлкәннәр көнендә дә бергә идек. Быел да Наил абый Васыйлов кебек хөрмәтле кеше чакыргач сезгә килергә шатланып риза булдым, – диде Илфир Исламов.

 

Чәй табыныннан соң өлкәннәр залга уздылар. Анда алар адресына бәйрәм уңаеннан котлаулар яңгырады, барысына да атап җырлар, биюләр башкарылды. Югары Ушма төп мәктәбе укучылары да бай концерт номерлары әзерләгәннәр иде. Әби-бабайлары аларга рәхмәт әйттеләр. Авыл җирлеге быел ветераннарга кирәкле әйберләрен РайПО кибетләреннән үзләре кереп алсын өчен йөз иллешәр сумлык талоннар әзерләгән иде. Бу – кабат кемдер пакетка салган әйберне ошатмыйча сөйләнеп йөргәнче отышлырактыр да. Һәркем үзенә ошаганын сатып ала. Авыл җирлеге аша барысы 168 ветеран хөрмәтләнде, аларга 25 мең сумлык талоннар таратылды.

 

Хәсәнша һәм Иске Завод авыллары клубларында да оештырылды шундый ук бәйрәм табыннары, өлкәннәр өчен концертлар. Хәсәншадагы чәй өстәленең иганәчеләреДания һәм Илдар Сәетовлар, мәдәният хезмәткәре Хамис Сөнгатуллин, фельдшерТәнзилә Сөнгатуллина; Иске Завод авылындагыныкы – Илсөяр һәм Әлфәт Котдусовлар булды.