«Вятка» тау чаңгысы комплексында спорт классындагы укучылар өчен дәресләр башланды.
«Татарстанда Кыш» республика проекты дәвам итә һәм «Вятка» тау чаңгысы комплексында «академик К.А. Вәлиев исемендәге 2 нче лицей» мәгариф үзәге базасында ачылган тау чаңгысы буенча махсуслаштырылган спорт классының беренче дәресе узды.
Яшь спортчылар экипировканың тулы комплектында һәм сизелерлек энтузиазм белән тау чаңгысы спортын һәм сноубордингны үзләштерә башлау өчен җыелдылар. Тәҗрибәле тренерлар җитәкчелегендә егетләр беренче тапкыр тау чаңгысына һәм сноубордларга бастылар, тау битендә беренче адымнарын ясадылар. Дәресләр мәҗбүри разминкадан һәм куркынычсызлык техникасы буенча тәфсилле инструктаждан башланды. Аннары укучылар төп элементларны өйрәнүгә керештеләр: сөзәк трассаларда дөрес басып торырга, борылышлар ясарга һәм тизлекне контрольдә тотарга өйрәнделәр. Тренерлар һәрберсе белән индивидуаль эшләде, хәрәкәтләрне төзәтергә һәм шуу техникасының нечкәлекләрен аңлатырга ярдәм итте. Күп кенә тәрбияләнүчеләр өчен бу беренче шуу тәҗрибәсе булуга карамастан, балалар спортның яңа төре белән кызыксыну күрсәттеләр. Оештыручылар билгеләп үткәнчә, махсус класс ачылу районда тау чаңгысы спортын үстерүдә мөһим адым булып тора. Белем бирү программасы укучыларны төрле дәрәҗәдәге ярышларда катнашуга акрынлап әзерләү өчен корылган.