ТР Дәүләт Советы Рәисе урынбасары Марат Әхмәтов эш сәфәрендә Мамадыш районында булды
Бүген Дәүләт Советы Рәисе урынбасары Марат Әхмәтов эш сәфәрендә Мамадыш районында булды, анда Соколка авылындагы «Кама» балаларны савыктыру лагереның эше белән танышты, педагоглар һәм ял итүче балалар белән аралашты, лагерьда нинди чаралар узуы турында кызыксынды.
Мамадыш районы башлыгы Вадим Никитин озатуында Марат Әхмәтов торак корпусларны, ашханәне, медицина блогын һәм спорт мәйданчыкларын карап чыкты. Балалар белән аралашканда, Дәүләт Советы Рәисе урынбасары ассызыклаганча, җәйге сәламәтләндерү лагере – уку өчен яңа көч туплау гына түгел, ә яхшы дуслар табу өчен уникаль урын. «Балалар мондый коллектив тормышка бик тиз ияләшәләр һәм зур тату гаиләгә әвереләләр", - диде ул. Марат Әхмәтов шулай ук ассызыклаганча, Татарстан Республикасы Рәисе Рөстәм Миңнеханов балаларның җәйге ялын оештыру мәсьәләләренә зур игътибар бирә, инфраструктура һәм куркынычсызлык мәсьәләләре генә түгел, сменаларны белем бирү программалары белән тулыландыру, үсеп килүче буынны тәрбияләү дә мөһим булып кала. Марат Әхмәтов шулай ук смена педагогларына лагерьда татар телен өйрәнүгә ярдәм итә торган чаралар оештыру, шул исәптән туган телне белү буенча конкурслар үткәрү тәкъдиме белән мөрәҗәгать итте. Бу тәкъдимне егетләр һәм вожатыйлар хуплады. Бүгенге көндә «Кама» балаларны савыктыру лагеренда 160 бала ял итә. Быел биш смена үткәрү планлаштырыла, анда 1 меңнән артык укучы катнашачак. Лагерь территориясендә 35 видеокүзәтү камерасы, 5 тавыш көчәйткеч урнаштырылган, Мамадыш районы буенча ОВО сак пультына чыгарыла торган сигнализация төймәсе бар. Инфраструктурага килгәндә, быел ТР Рәисе ярдәме белән 5 Сафари тент төзелде. Бүген очрашуда ике торак корпусны ремонтлау һәм яңасын төзү мәсьәләләре буенча фикер алыштылар. Бу темаларны район башлыгы Вадим Никитин күтәрде. Лагерь өчен үз пляжын җиһазлау мәсьәләсе дә актуаль булып кала. Район башлыгы фикеренчә, балаларның куркынычсыз һәм уңайлы ярда ял итү, табигый сулыкларда йөзү мөмкинлеге булырга тиеш.