Мамадыш районында мөгезле эре терлекләр өчен азык әзерләү кызу темпта бара.
Игенчеләр таңнан алып кояш баеганчыга кадәр эшлиләр, бигрәк тә һава торышы уңай булса. Һәр минут исәптә — терлек азыгын вакытында әзерләргә кирәк.
«Бүгенгә азык әзерләү темплары яхшы бара. Яңгырлар белән проблемалар булды, әмма тулаем төп бурычны үтәдек», - дип сөйли Руслан Таймасов, «АПК Продовольственная программа» ҖЧҖ генераль директоры урынбасары.
Бүгенге көнгә районда 50 мең тоннага якын сенаж әзерләнгән, шуларның яртысы - люцерна, ә икенче яртысы - көзге тритикале. «Хәзер без көзге тритикал буенча беренче чабышны тәмамлыйбыз һәм якындагы 3-4 көндә люцернаның икенче катына күчәбез», - дип аңлата Руслан Таймасов. «Таканыш» АПК кырында бер үк вакытта 20 берәмлек техника эшли. Әмма бу әле башы гына - алда әле терлек азыгы әзерләү һәм бөртеклеләрнең урып-җыю кампаниясе, аннан аграрийлар югары нәтиҗәләр көтәләр.