Ураза Гаете уңаеннан район башлыгының бәйрәм котлавы
Ураза Гаете уңаеннан район башлыгының бәйрәм котлавы
Хөрмәтле мөселманнар, кадерле райондашлар!
Барыгызны да ихлас күңелдән изге Рамазан ае тәмамлану һәм Ураза гаете белән тәбриклим.
Бу – бөтен мөселман халкы өчен иң күркәм һәм мөһим дини бәйрәмнәрнең берсе. Рамазан ае – ул рухи кыйммәтләрне һәм әхлак сыйфатларын камилләштерү чоры. Әлеге изге айда һәр мөселман кешесе тыелганнардан тыела, ятимнәргә, ялгыз һәм авыру кешеләргә, махсус хәрби операциядә катнашучы егетләребезгә ярдәм итә, күңеленә һәм җанына рухи пакълану ала.
Шушы изге ай дәвамында районыбызның барлык мөселманнары үзләренең татулыкларын, бердәмлекләрен тагын бер кат раслады. Бу авылларда, шәһәребездә күмәкләшеп мул табыннар артында ифтар мәҗлесләре үткәрүдә, мәчетләрдә рәт-рәт тезелеп тәравих намазлары укуда чагылды.
Бүгенге көндә илебез авыр сынаулар уза. Махсус хәрби операциядә катнашучы егетләребезгә көч-куәт, сабырлык һәм тиз арада җиңү белән әйләнеп кайтуларын телим. Аларның батырлыгы, Ватанга тугрылыгы – безнең өчен олы үрнәк.
Әлеге якты көндә барыгызга да күтәренке кәеф, бәхет, сәламәтлек, тынычлык, иминлек телим! Ураза бәйрәме – мөбарәк, барыгызның да тоткан уразаларыгыз кабул булсын, барлык теләкләрегез, якты уй-хыялларыгыз тормышка ашсын!