Вадим Никитинны Мамадыш районы Башлыгы итеп сайладылар
Бүген Мамадыш районы башлыгы итеп 42 яшьлек Вадим Никитины сайладылар. Мондый карарны район Советы депутатлары Мамадыш муниципаль районы Советының 33 нче утырышында кабул иттеләр. Утырыш ТР Дәүләт Советы вице-спикеры Марат Әхмәтов рәислегендә узды.
"Туган районым өчен җаваплы булырга, аның кешеләре хакына лаеклы һәм фидакарь хезмәт итәргә әзермен. Туган җиремдә минем өчен төп бурыч — халыкның тормыш дәрәҗәсен күтәрү, һәр мамадышлыга куркынычсызлык, уңайлылык һәм районның һәр кешесенең потенциалын ачу мөмкинлеге бирә торган барлык социаль гарантияләрне тәэмин итү», - диде Никитин тантаналы шартларда. Моннан тыш, район башлыгы авыл хуҗалыгын үстерүне дәвам итәргә уйлый — беренче чиратта шәхси ярдәмче хуҗалыкларны эреләндерү исәбенә. Никитин районда җитештерүне үстерүгә аерым игътибар бирде. Ул ел саен сәнәгать күләмен кимендә 10-15% ка арттыру һәм гамәлдәге сәнәгать паркларының тулылануын арттыру бурычын куйды. Исегезгә төшерәбез, Мамадыш районы башкарма комитеты җитәкчесе вазифаларын башкаручы итеп В.И.Никитинны 31 майда билгеләделәр. Моңа кадәр ул Питрәч районында шундый ук постны биләгән иде. Вадим Ильич тумышы белән Җөри авылыннан. Аның ике югары белеме бар: 2005 елда «финанс һәм кредит» белгечлеге буенча Казан дәүләт финанс-икътисад институтын , ә 2014 елда РФ Президенты каршындагы Россия халык хуҗалыгы һәм дәүләт хезмәте академиясен («Дәүләт һәм муниципаль идарә») тәмамлаган. 2007 елдан 2022 елга кадәр ул Мамадыш районында төрле вазыйфаларда эшләгән. Өйләнгән, кызы бар. Вадим Никитин үзенең телеграмма-каналында район башлыгы статусында беренче постын бастырды инде. Анда ул республика җитәкчелегенә һәм өстәмә муниципаль сайлауларда аның кандидатурасын хуплаган якташларына рәхмәт белдерде. Исегезгә төшерәбез, 8 сентябрьдә алар 4 муниципаль берәмлектә 4 бермандатлы сайлау округы буенча узды. Вадим Никитин 6 нчы Мамадыш бер мандатлы сайлау округы буенча Мамадыш шәһәр Советы депутаты итеп сайланды.