Шәдче авылында реконструкциядән соң Бөек Ватан сугышында катнашучыларга һәйкәл ачтылар
Бүген Мамадыш районының Шәдче авылында Бөек Ватан сугышында катнашучыларга һәйкәл ачу тантанасы булды. Гранит плитәләрдә каты сугыш шаһитларының, шулай ук Әфганстанда интернациональ бурычларын үтәгән 12 хәрбинең исемнәрен мәңгеләштерделәр. Җирлек халкы белән шатлыклы вакыйганы якташыбыз, шагыйрь, публицист һәм җәмәгать эшлеклесе Зиннур Мансуров бүлеште, ул үзенең чыгышында хәтер объектларын реставрацияләү һәм төзү патриотизм күрсәткече генә түгел, ә бу уңай үзгәрешләр булган территориянең цивилизацияле булуы билгесе дә, дип билгеләп үтте.
- Мин күп кенә төбәкләрдә булдым, көнбатыштагы яңалыкларны күзәтеп торам һәм бөтен җирдә дә тарихи үткәнебезгә карата безнең Татарстандагы кебек сизгер мөнәсәбәт юк дип әйтә алам. Һәйкәлләр җимерелә торган илләр якты киләчәккә өметләнә алмый. - диде Зиннур Мансуров, ул бүген, сүз уңаенда, иҗат яшьләрен тәрбияләүгә керткән өлеше һәм район белән тыгыз элемтәдә торуы өчен, район башлыгы исеменнән Рәхмәт хаты алды.
Һәйкәлне каплап торган үтә күренмәле материалны җирлек башлыгы Валерий Шрыков белән бергә ачтылар. Ул хәзер тарихның үзендә дә пәрдә юк, дип сөйләде – сугышта катнашучылар турындагы мәгълүматлар бөртекләп, җентекләп җыелган.
Исегезгә төшерәбез, быел район башлыгы 80 һәйкәлне торгызуны башлап җибәрде һәм бу процессны финанслауга иреште. Анатолий Иванов бүген якташларының «хәрби рухы» на игътибарын юнәлтте, авыл территорияләренең перспективалары турында сөйләде, беренче эш итеп бу көздә төзелә башлаячак 55 объект турында искәртте.
- Алар арасында 25 спорт мәйданчыгы, балалар мәйданчыклары, парклар, тротуарлар бар. Кайчагында уйлау да куркыныч: озак вакыт эчендә шулкадәр проектларны тормышка ашырырга кирәк. Әмма боларның барысы да безнең кешеләр файдасына, барысы да уңышка ирешәчәгенә ышаныч тудыра, - дип белдерде район башлыгы.
Чыннан да, зур үзгәрешләр булачак. Район башлыгы берничә көннән соң яңа завод ачылачак сәнәгать мәйданчыгына һәм «гасыр төзелеше» нә - ярларны тоташтырып кына калмыйча, мамадышлылар алдында эшкә урнашу өчен яңа мөмкинлекләр ачачак Кама аша күпергә дә зур өметләр баглавын белдерде. Проект зур, аны гамәлгә ашыру өчен бик күп эшче куллар кирәк булачак.
Киләчәк турында уйланулар, бу киләчәк бүләк иткән кешеләр исемлеге фонында, безнең өчен әти-бабаларыбызның юкка гына сугышмавының иң яхшы дәлиле булып тора.