Хыяллар Яңа ел алдыннан тормышка аша.
Бераз тарих Хәтерегездә булса, быелның сентябрь аенда “Нократ“ газетасы әлеге мәктәпнең интернет-акциясе турында сөйләде. Акция кысаларында теләгән һәркем сугыштан кайтмаган туганнары турында мәгълүмат белән уртаклаша ала. Аны Җәнлек совхозы мәктәбе кызлары һәм малайлар уйлап тапканнар. Шушы ук балалар каһарман якташыбыз истәлеген мәңгеләштерергә кирәк дип санаганнар. –Безнең кулда мондый мемориаль такта куярлык акча юк иде әлбәттә, – дип сөйли педагог оештыручы һәм рус теле укытучысы Зөлфирә Юнысова. – Шуңа күрә аларны кайдан табарга дип уйлый башладык. “Инициативалар картасы“ онлайн-мәйданчыгы турында белдек. Анда социаль-файдалы проект турында сөйләргә һәм аны тормышка ашыру өчен финанслау алырга мөмкин. Нәтиҗәдә, 12 декабрьдә, “Социаль ярминкә“нең беренче хәйрия фестивалендә безгә 12 мең сумлык сертификат тапшырылды. Бу акча мемориаль тактага җитте. Әйе, Михаил Кириллович вафатына 50 ел вакыт узганын һәм бу изге эшне күпкә иртәрәк башкарырга кирәк булганлыгын аңлыйбыз. Тик, балалар үзләре шундый инициатива белән килгәч, алар өчен чиксез горурлык хисе тоясың. Хезмәт нәтиҗәләре Каһарман Михаил Москвин яшәгән йортка исемле табличканы урнаштыру чарасында аның гаиләсе: кызы, оныклары, оныкчы клары да катнашты. –Күрше йортның фасадында сугышта катнашкан кеше яшәгән дигән элмә такта бар. Безнең йортта мондый хәлнең булганы юк иде әле. Әтинең вафатына ярты гасыр үтсә дә, – ди Михаил Кирилловичның кызы Рәисә Галиева. – Хәзер барысы да үз урынында. Әтиемә күрсәтелгән игътибар һәм хөрмәт өчен зур рәхмәт. Ул бик яхшы кеше иде. Финанс мәсьәләсеннән тыш, әлеге чараны оештыру эшләре дә җирле мәктәп укучылары җилкәсенә төшкән. Сыйныфлары Михаил Москвин исемен йөртүче тугызынчыларга мемориаль такта ачуны һәм чәчәкләр салуны ышанып тапшырганнар. –Безнең өчен бу бик зур дәрәҗә. Без ел саен Михаил Кирилловичның каберенә барабыз, аның батырлыгы тарихын яхшы беләбез. Шуңа да, мөгаен, хәзер бик дулкынланабыздыр, – дип, Әдилә Миниязова белән Раил Иванов тәэсирләре белән уртаклаштылар. Башкаларга үрнәк Чара җәнлек совхозы мәктәбенең актлар залында дәвам итте. Сәхнәдән патриотик җырлар һәм шигырьләр яңгырады. – Бүген малайлар һәм кызлар чын батырлык дәресендә булдылар. Шунысы куанычлы: аларга кечкенәдән батырлык һәм Ватанга мәхәббәт кебек мөһим төшенчәләрне сеңдерәләр. Сезнең мәктәп башка мәгариф учреждениеләре өчен үрнәк булып тора, – дип ассызыклады район мәгариф бүлеге җитәкчесе урынбасары Айрат Шакиров.