2019 ел уңышы ашлыгына интервенцияләр уздыру очрагына минималь бәяләр расланды.
Татарстан Республикасы Авыл хуҗалыгы һәм азык-төлек министрлыгы, 2019-2020 елларда интервенция ашлыгын дәүләт сатып алуларын уздыру турында карар кабул ителгән очракта, 2019 ел уңышы ашлыгына минималь бәяләрнең иң чик күләмнәре раслану турында хәбәр итә. Авыл хуҗалыгы һәм азык-төлек министрлыгының бу хакта тиешле карары 2019 елның 18 маеннан үз көченә керә.
Документта билгеләнгәнчә, шундый карар кабул ителгән очракта, Россиянең барлык субъектлары буенча, өстәлгән бәяне (НДС) исәпкә алып, түбәндәге бәяләр билгеләнергә мөмкин: өченче класслы йомшак бодайга: Үзәк федераль округта - бер тоннага 9 900 сум, Көньяк федераль округта (ЮФО) һәм Төньяк-Кавказ федераль округында (СКФО) – 11 100 сум, Идел буе федераль округында (ПФО) - 8 600 сум, Урал федераль округында (УФО) - 9 600 сум, Себер федераль округында (СФО) һәм Ерак Көнчыгыш федераль округында (ДФО) - 8 400 сум.
Дүртенче класслы йомшак бодайга Россиянең барлык субъектлары буенча, өстәлгән бәяне (НДС) исәпкә алып, түбәндәге бәяләр билгеләнергә мөмкин: ЦФОда - бер тоннага 9 000 сум, ЮФО һәм СКФОда - 10 200 сум, ПФОда - 7 600 сум, УФОда - 8 500 сум, СФО һәм ДФОда - 7 900 сум.
Бишенче класслы йомшак бодайга бәяләр, НДСны исәпкә алып, түбәндәгечә куела: ЦФОда - тоннага 7 800 сум, ЮФО һәм СКФОда - 9 100 сум, ПФОда - 6 800 сум, УФОда - 7 900 сум, СФО һәм ДФОда - 7 300 сум.
Өченче класстан да түбәнрәк булмаган арышка бәя, НДСны исәпкә алып, Россия Федерациясенең барлык субъектлары буенча бер тоннага 6 700 сум дип куела. Бер тонна арпа өчен бәя, НДСны исәпкә алып, Россия Федерациясенең барлык субъектлары буенча бер тоннага 7 100 сумнан алып 10 600 сумга кадәр куела, өченче класстан түбәнрәк булмаган кукурузга бәя, НДСны исәпкә алып, бер тоннага 8 100 сумнан 9 700 сумга кадәр куела.
Татарстан Республикасы Авыл хуҗалыгы һәм азык-төлек министрлыгы шуны искәртеп уза, Россиядә ашлык (товар ашлыгы) сатып алу һәм сату буенча дәүләт интервенцияләре 2001 елдан башлап эчке бәяләрне җайга салу өчен уздырыла. Көзен, базарга ашлык кергәч, бәяләр төшә, шуңа күрә дәүләт аграрийлардан ашлык сатып ала, бу аларга ярдәм итү максатында эшләнә, ә кышын һәм язын бәяләр артуны булдырмас өчен дәүләт ашлыкны интервенция фондыннан сата.